Elch auf Reisen

<%PostCommentPage%> <%PhotoAlbumPage%> <%ProfilePage%>

Santiago de Chile / Buenos Aires / Patagonien

08:28, 13 December 2012 .. 1 comments .. Link
Huhu...

Jeepi, es isch wurkli so wit, ich bin i de suedlichschte Stadt vo de Waelt :) So oeppis...und wemmer a Suede daenkt, het mer doch s'Gfuehl es muessi warm sie oder?

Pucon / Santiago de Chile
Mini Pferdetrek in Pucon hani einigermasse ohni Schade ueber d'Buehni bracht...wobi min wisse Allerwertischte, denach sicher nueme wiss, sonder eher is rot gwaechslet het und sich de uf wundersami Wis wie en Raegeboge veraenderet het.
Naja, das Ganze het mich aber ned devo abghalte am nacheschte Tag de Cani-Trek in Agriff znae, bi wellem ich mitere traumhafte Ussicht (Bild 1) belohnt worde bi..eifach de Rast ufem "Mirador" hani im Stah verbracht ,-)

Miteme Zwueschedstopp bini de nach Santiago de Chile gfahre. Leider het mi s'Waetter ab Pucon im Stich lah. Ihr kenned doch de Spruch "wenn Engel reisen..." ...was isch de jetzt los hani mir denkt...Reisi nuem richtig oder het de wo ueber d'Engel entscheidet irgendwie kei Ahnig vo Engel? So bini de am 1.12 freudig is Flugi nach Buenos Aires gstige und ha ghofft, dass mich in Argentinie bessers Waetter erwartet.


PATAGONIEN - TOUR
So isches de au gsi. In Buenos Aires het mich wunderbars warms Waetter begruesst und so hani en super Start i mis Patagonie-Abentuer gha. Aendli hani mini wisse Bei mal choene a d'Sunne strecke.

Bald scho hani mini Reisegruppe, mit wellere ich die naechschte 2 Wuche verbringe wird kaenneglernt. Mir sind irgendwie es ganz glatts Grueppli und bestoend us 5 Kangis (Aussis, 2 Amis, 2 Raseschlifer (Englaender) und juuupi, enere andere Schwizeri.)

Mit dene Luet hani also mini Tour dur Patagonie gmacht und es paar ganz luschtigi Taeg erlaebt. Irgendwie sind mer zwar wieder ned als Engel deklariert worde aber das het eus ned gross gstoert. Es isch so lang hell da unne, de wird das wieder usgliche :) I dene 2 Wuche het d'Janine und ich eus also zum Ziel gsetzt dene aenglischspraechende Luet e chli schwizer Kultur bizbringe. Mitlerwile wuesseds was Prost isch, choend Guetzli saege und hend scho ihre erschti Kaffischnaps gha..was aber immernani klapped, isch bim Proschte au i d'Auge zluege..irgendwie isch das glaub ned so eifach..aber mir gebed ned uf hend jo no zwei Taeg ziit. ,-)


Perito Moreno Glaciar (Bild 2)
Mit Bus und Boot sind mer vom Ort El Calafate zum Perito Moreno Glaciar (eine vo de wenige no wachsende Gletscher vo de Waelt) gfahre. Ich mein, mir Schwizer hend ja au Gletscher um eus...aber wenn mer de mitem Boot a die riise Iswandfahrt und das ohrendbetaubende Gruesch ghoert, wenn es Gletscherstuck in See gheit...denn isch mer eifach gewaltig beidruckt... WOW

Fitz Roy (Bild 3)
Es paar Taegli spaeter...isch de de Spruch mit de Engel doch wahr worde... Mir hend naemli e Wanderig zum Fitz Roy (geniale Bergspitz) unterno und sind unglaubli gluecklich gsi, dass mer ihn au hend daerfe bestune. Da in Patagonie schlaht s'Waetter immer so schnell um und oftmals gseht mer de geniali, imposanti Bergspitz ned. .sondern nume Wulche.

Torres del Paine (Bild 4)
Nachdemi mer euse Salamiverluscht (a de chilenische Graenze het er muesse sis Laebe la) ueberwunde hend, hend mer euses Zaelt im Nationalpark Torres del Paine choene bezieh. Da hend mer de ebae au d'Kaffischnapslehrstund gmacht....falls er also mal amene aenglischspraechende-suedamerikabereisende-Kaffischnapsdrinker begaegnet wo Prost seit und s'Glas abchlopft bevor ers witergit...de wuessed ihr, de het bi eus e herti Kulturschuel durlofe...und kennt au es paar Fluechwoerter also aufgepasst :)

I dere geniale Umgaebige hend mer mehreri Wanderige unterno und einisch me die geniale Bergspitze Torre Sur, Central und Norte daerfe bestune. D'Guanacos und au die tribende Isscholle (Bild 5) sind es witers Highlight i dem beidruckende Nationalpark gsi.

Weniger beeidruckt het mich aber, dass ich mini Kamera im Bus lige la ha....wie chan mer au nur... choend eu ja vorstelle, wie ich mir d'Haar grauft ha (jeeepi, chum mitere Glaze hei - s'Wiehnachtsgschaenk fuer mich isch also klar :)) Aber d'Frau Hess het Glueck im Unglueck gha (au es blinds Huehn find mal es Chorn) und ha mini Kamera en Tag spaeter wieder daerfe entgaegene...  :)  Juuupi, also ich han no es paar Haaerli, kei Peruege noetig ,-)


Jetzt secki grad in Ushuaia (ebe dae suedlichschte Stadt) und morn gahts de vo dem wunderschoene Suede mit dene unglaublich grosse Flaechene, viele Schaaf, unberuehrte Landschaft und mega spezielle Bergformatione wieder nach Buenos Aires.

Am Suntigabig heissts de es letschts mal - ab in Flueger- und das mal isch s'Zielort Madrid. Unglaubli, mini Ziit da i dem geniale und vorallem wunderschoene Kontinaent isch scho verbi. Ich ha jedi Minute gnosse und bin mer sicher HASTA LUEGO!!!!

So, das wers gsi. Ich wuensch eu allne ganz schoni Wiehnachte und en super Rutsch ines genials 2013. Bis bald y hasta pronto.


P. S: Fuer alli wo mich hend welle am Montag vom Flughafe go abhole....ich han no en chline Zwueschestopp vo 4 Naecht in Madrid und lande erscht am Fritig....puenktlich uf mim Brueder sin Gebudi und de Waeltuntergang. :)

Potosi / Uyuni / Suedchile

02:15, 20 November 2012 .. 0 comments .. Link

Ziit vergaht eifach viel viel zschnaell..nur no 4 Wuche und ich bi scho wieder Diheime.
Naja, aber ihr wend ja ned mis Giammer laese sondern, was ich so alles erlaebt ha i de letschte Ziit. :)


La Paz (ciao) / Potosi
Nach 2 Wuche warte, het mich mini Zahnaerztin aendli (mit Spruetze, Antibiotika und Schmerzmittel im Gepaeck) la witerreise. Am 19:00 Uhr hani vo mim Glueck erfahre und am 20:30 Uhr bini scho im 10-Stunde-Bus nach Potosi (Silberminestadt) gsaesse.

Am Morge am 06:30 Uhr bini de acho. Woni usem Taxi usgstige bi, het sich mini Hose doch tatsaechlich fuer d'Unabhangigkeit entschiede und het eine uf atmigsaktiv gmacht....jawohl...wie es Reh, bini mit wissem Hinter da gstande...jana...die Hose isch mit aller Wuerdi wo mer anere Freiluftkaempferi entgaegebringtbringt, verabschiedet worde ,-)

Schoen brav, bini mi de au im Rote Chruetz go staeche la...ich bi also gar ned trurig gsi, dassi s'Wundermittel und vorallem au d'Spruetze ha daerfe saelber mitbringe :)

Am 09:00 Uhr isch de scho d'Minetour losgange. So hanimi mit 2 Reisekollege uf de Waeg gmacht. Als Mitgift fuer d'Minearbeiter hend mer en Kokabletter, d'Zauberpaste (damit das Ganze au nuetzt), 98%  Alkohol und Zigarette kauft....achja und die einte hend de nochli Dynamit dezue poeschtelet...will mer hend jo euses eigne Loch welle spraenge.

So sind mer ned viel spaeter i orange Uebergwaendli (also wie d'Holcimchauffeure), Helm, i Gummistifel und mit Coca und Dynamit bewaffnet i d'Mine gstapft.
D'Fuehrig isch meeeeega spannend gsi und ich ha gar ned gmerkt wie schnell das d'Ziit vergange isch (vorallem ich d'Cocabletter zum Wohl vo mim Zah saelber kaetsched ha). Wo mer de wuerkli euses eigene Loch i d'Mine gspraengt hend und jede chli mit Dynamit baschtlet het, hani gwuesst, dass in Bolivie s'Motto "todo es possible, nada es seguro" wuerkli de Warheit entspricht.

 

Uyuni
Miteme Hollaneder bini de witer nach Uyuni (em graeschte Salzsee) greist.
Unterwaegs hend mer no e Koeraneri ufgrisse und so isch eusi Reis perfekt xi.
In Uyuni hend mer inere ganz spezielle Baar, en gaanz spezielle Drink becho...da das aber ned ganz Jugendfei isch,  verzell ich das nur gege Uswiskontrolle ,-)

Die 3-Tagestour dur de Salar Uyuni isch oeppis vom schonschte xi, woni je gseh ha. Mir sind dur die unaendlich grossi wissi Flaechi gfahre, hend geniali Foeteli gmacht (Bild 1), hend e geniali Kaktusinsle bsueched (Bild 2),  sind a wunderschone Lagune verbi duesed (Bild 4 / 11), sind Flamingos begaegnet, sind bim Baumstei (Bild 5) umeklaettered und sind bim Sunneufgang bi Gysir (Bild 6) umespaziert...eifach WOW.

Die Tour het mich dae aber au ueber d'Graenze vo Bolivie uf Chile bracht. Es isch mer schwer gfalle, das wunderschoene Bolivie zrugg zla... und ich bi mer fascht sicher, dassi wiedermal i dem geniale Land, mit de wunderbare Luet wird si....verruckt aber vermisses jetzt scho.


San Pedro de Atacama
In San Pedro de Atecama (Nordchile) hani mit de Sinai (Koreaneri) zaemme es wunderbars Hostal gfunde, mitem genialschte Hostalmanager aller Ziite....er isch so luschtig xi, dass ich kei Minute ohni Lache ha chone verbringe. D'Hangematte hani kes einzigs Mal muesse saelber zum schaukle bringe und so hanis natuerli gnosse, wenn isch mer scho d'Kleopatra im Paradis? Naja, alles het sin Pris (und erscht raecht in Chile) Ich bi als Franzlehrer aghueret worde (und das isch zimli schwer, wenn mer als ned spanischspraechende Maensch, versuecht sit es paar Monete spanisch zrede und de ploetzli wieder soett uf Franz waechsle)...es het aber einigermasse klapped und so han ich s'Paradis uf Erde gha ,-)  (He, Buerojungs...ihr wuessed wos gschlage het, wenn d'Kleopatra zrugg chunt  ,-))
In San Pedro hend mer denn au de Usflug zum beruemte Valle de la Luna (Bild 9) gmacht.... Die kargi Landschaft het mi a Bolivie erinnered und eimal me umghaue.


Puerto Varas
Miteme Inlandflueg bini scho bald witergreist und so isch fertig Wuesti gsi... s'Gruene in Puerto Montt het mi fascht verdruckt...en Kulturschock...au s'Spanisch hani ploetzli nuem verstande (ich ha fascht muesse Lache wini gmeint ha die Lisplet...defuer redet die so ,-)).

Miteme churze Zwueschehalt ufere Insle, bini witer nach Puerto Varas greist. Vom Ufer us gseht mer ueberem See (wo starch an 4-Waldstaettersee (Bild 7)erinneret) de Vulkan Osorno... de perfekti Vulkan. Bi dene Vulkan (Bild 7) chum ich mir vor wie es Magnetli...die ziehnd mich unheimlich in Bann und am liebschte wuerdi uf jede ufechragsle ,-)


Pucón
Jetzt stecki in Pucón....em Touristezentrum vo Chile...und es isch mega. Ich bi da imene meeega luschtige Hostel glandet. Ich wohne im Garte imene Igluzaelt und bi scho als Mitarbeiteri agstellt worde...ha au scho es Jobagebot....aber leider isch das ja noed moegli :)

Da in Pucon hets ganz viel Sache wo mer cha mache...mal luege zu was ich mich no cha ueberrede la. Bi scho ufem Vulkan xi (Bild 8), im Nationalpark (Bild 10) und huet hani mi fuer en Pferdetrek ueberrede la.. (choend ihr mich ufeme Ross vorstelle...oh Gott...wie chunt das aecht use) ,-)

 

So, das wers au scho wieder gsi, ich wuensch eu gueti Ziit und bis bald
Eliane

Copacabana / La Paz

03:36, 6 November 2012 .. 0 comments .. Link
Halli Hallo

Ich sitze da grad mit ca. 30 Bolivianer ime Internetschuppe und probier mini Erlaebnis i d'Tastatur zbringe... gar ned so eifach, vorallem bini wieder chli braemsed worde...irgendwie fasziniered mich Zahnaerzt i dene Laender  :)

Jeepi, mittlerwile bini in Bolivie (3x so gross wie Duetschland und 9.5 Mio Iwohner) aglangt. Bolivie isch no guenstiger als Peru und d'Ande sind eifach wow. D'Luet sind chli schuecher wie in Peru und das chunt mer ganz glaege..


Copacabana (Bild 1)
Nach minere 1. Wurzelbehandlig in Arequipa hani aendli nach Copacabana choene witerreise. D'Busgsellschaft het de aber ploetzli doch no en Zwueschestopp igleit und so bini no en Abig in Puno gstrandet. Det hend mich zum Glueck 2 netti Franzose ufgablet und so isch s'Uebernachte kes Problem und erscht na gratis gsi :)

In Copacabana hani de fuer 20 Bolivianos (also weniger wie Fr. 3.- ) gschlafe, zmoergeled und ha sogar zu allem ane no Agua caliente gha...(was da gar ned saelbschtverstaendlich isch) He und de hani erscht no choene s'Gschaeft erledige und dusche glichzitig, wo chan mer das scho :) Damit mer warm Wasser bechunt, muemer zerscht mal s'Wasser astelle (chalt) und de de elektrisch Hebel betaetige, wo Kabel frei umeghanged + nass sind....da hani scho chli Respaekt gha, wer langed scho gern mit nasse Finger elektrischi Kabel a wo ned mal isoliert sind. Naja, ich chan eu saege Durwaelle staht mer ned so ,-)  Nei quatsch, ich laebe no und ha immer noch Schnittlauchlocke :)

Copacabana isch es Wahlfahrtsort und de Grund warum de beruehmti Strand in Brasilie so heisst. Es lit am Titicacasee uf 3818m. Luschtigerwis bini det wieder uf mini 2 Australier vo de Schuel gstosse und so hend mer am naechschte Tag gmeinsam d'Isla de Sol (Bild 9) zfuess erkundet. Es isch mega schoen gsi...aber au uuuuuuu touristisch...


LA PAZ
Vo Copacabana bini de witer mitem Bus nach La Paz gfahre. Das isch es Erlaebnis gsi. Das gheisse het de Bus fahri diraekt, bini raecht erstunt gsi wos gheisse haet, mer muessed usstige.... Mini Verwirrig het sich denn aber schnell gloest. Mir hend nemli ines Boetli muesse umstige und euse Car isch ufere Art Holzbraett (Bild 2) ueber e schmali Seestell gfahre worde. Ich wuerd mich ja ned gad als aengschtlich bezeichne, aber da hani de bammel gha, dass de Car mit mim ganze Backpack unter gaht... er hets aber ueberlebt und so bin ich es paar Stund spaeter wohlbehalte in La Paz acho.

La Paz (Bild 3) isch e cooli, risigi Stadt..und chlaebt irgendwie richtig i de Berge. Ich meine sie isch ja au uf 3600m.  Es isch mega schwirig sie zbeschribe, denn sie isch vo huebsch bis wuescht und vo risig bis ganz uebersichtlich... eifach unbeschriblich.

In La Paz hani verschiedeni Sache erlebt....so bini z.B. zum erschte Mal i mim Laebe es Wrestling goge luege .. laeck isch das ab gange. :) Eifach undglaubli luschtig..Da sind die Fraue i Trachte ufenand los (Bild 8), Bluet isch gflosse und am Schluss isch s'Ganze Stadion zunderopsi gsi...denn das Wrestling het irgendwie ned nur im Ring stattgfunde....ich han ca. 5 mal muesse fluechte wili suscht under de Hammer cho wer.

Ufem Maert (wo wines wilds Durenand isch) hani de au die vom Chrigi empfohleni Spezialitaet Api con Pastel probiert (Bild 7)..uf s'Mal bini d'Hauptattraktion gsi und all hend welle es Foeteli mit mir mache....aber oho, du wetsch sie fotografiere, das hends de gar ned gern!

Ich han mich de au uf de empfohleni Takesi-Trek (3-Tagestour) gwagt. Die Wanderig isch uuu easy aber wunderschoen (Bild 6) gsi und het eus vo 4650m bis uf 2000m bracht. Vo karge Berge, Lama (Bild 5), bis zu afangs Tschungel hets alles gha. Leider het s'Watter ned ganz mitgspilt und so hani zum erschte Mal mini ganzi Raegeusrueschtig brucht. Bi de Zaeltussuechi bini en ware Glueckspilz gsi, de mis Zaelt isch seinzige dichte gsi ,-)

Da mer unterwaegs de doofi Zah wieder agfange het weh mache, bini einisch meh uf Zahnarztsuechi :(. Mit mine bescheidene Spannischkenntnis hani mi de mit zwei Zahnaerztine a d'Wurzelbehandlig gwagt. Naja, mitlerwile hani die 3ti Behandlig hinter mir und morn staht de naechschti Termin a.
Da ich sones Glueckspilzli bi, hets de au no en Infekt ge und ich ha mich im Spital daerfe pickse la.  Falls also jemals oepper da zum Zahni / Spital muess..don't worry ..es isch nur halb so wild ,-)

Zwuesched mine Termin machi immer wieder 1/2-Tages-Usflueg mit de oeffentliche Microbues. S'Reise mit dene isch eifach genial...das sind so Lieferwaegeli, Tuer immer offe und eifach ein Manzgogel wo umschreit wohi er fahrt.. ,-)..d'Tuer wird nie zuegmacht und istige muess mer in fahrende Bus. :) So hani z.B. Cuesta de los Animas erkundet (Bild 4)

Mini nachschte Ziel werdet de Sucre, Potosi und d'Salzseea vo Uyuni si.....und de wubs...bini scho in Chile und hoffentlich ohni Zahverzoegerige  :)

Liebs Gruessli us La Paz

Puno / Arequipa

05:55, 22 October 2012 .. 0 comments .. Link

Huhu

Mitlerwile bini in Arequipa und warte uf mini Witerreis.Aber jetzt zerscht mal de Reihe na :)

Puno:
Vo Cusco bini mitem Bus uf Puno greist..ned elei, sondern mit 2 Girls. Puno lit am Titicacasee 3810m (de hoechschtglaegni befahrbari See uf de Waelt)`. Det hani natuerli mitere 2-Tages-Boottur (ja ihr kenned mich, ich ha au mit Reisetablette mueh gha d'Kreie ned zfuetere) die obligate Uro-Insle (schwuemmendi Insle)  d'Isla Amantani (womer binere Familie gschlafe und gaesse hend (Bild 8 / 9) und uf de Isla Taquile bsuecht. D'Familie isch mega idruecklich gsi...e so bescheide zwohne..eifach unglaubli..

 

Arequipa + Umgaebig:
Das isch mini erlaebnisrichschti Umgaebig bis jetzt gsi...soviel Erfahrige und Gfuehl hani da gha...eifach wow.
Ich saege nur: - richtigs Peru (vorallem s'Aesse), - Hoehechrank, - 4 Zahnaerzt-Bsuech und Tschau saege..aber ich liebe die Stadt und alles de Rehie na.

Arequipa:
Mitem Nachtbus sind mer i die wunderschoen glaegni Stadt gfahre, am 4i acho und am 10i miteme Peruaner woni kenneglernt ha zur Stadtfuehrig abgmacht. Das het de gfaeged..de fahrt mer mal ned nur de Turisteoertli na und s'Taxi choschtet au nur no d'Helfti (debi hani gmeint ich handli so guet) Mir sind a Ussichtsorte gsi (Bild 12), sind go z'Mittagaesse wo nur Peruaner goend (448 Peruaner und 2 Europaer hend det Zmittag gaesse, choend eu ja vorstelle wie mir agafft worde sind). S'Aesse isch de wahnsinn gsi (Foeteli) Mir hend fuer Fr. 20.- es Meersaeuli, en Taeller Saeufuess (das isch mini Spis gsi..ja Saufuess) und en Herdoepfelgratin mit gfuellte Peperoni gha. Natuerli hets dezue Chicha (vergornigs Maisgetraenk mit Allohol) gae. Ich ha no nie so viel gaesse und vorallem so ussergwoehnlichi Sache (als Gluecksbringer hani de no 2 Chnoeche vom Meersaeuli muesse verspise)...naja zum Znacht sind mer de go Haerz aesse...das isch au numal e Erfahrig gsi :)
Wobi Glueck hets mer wohl ned so bracht...oder wer suscht mis Zaherlaebnis aecht no schlimmer use cho? Ich bi naemli es paar mal bin Zahni waege mine Dientes gsaesse..und mittlerwile binere Wurzlebehandlig aglanged...hoffed mer nur, dass sis Provisorium bis i d'Schwiz hebed. D'Verstaendigung isch uf jede Fall mega luschtig gsi..denn bim Zahni isches ja suscht scho schwirig zverstah was er macht..wenns de aber no so oeppis komischs isch und nur uf spanisch...naja..s'Lache isch mer ned vergange :)

Cañón del Colca
Mitere 2-Tages-Marschtour bini de mit de Marion (e Schwizeri woni vo Cusco kennt ha) de Colcacanyon derab 1200m und de wieder 1200m deruf gwanderet (Bild 11). Bsunders beidruckt het mi ned d'Landschaft, sondern die riise Kondore. Eifach genial, wenn mer die am Himmel gseht chreise (Foti 10) D'Fluegelspannwiti vo some Vogel cha bis zu 3.20 m werde...wow...da bin ich gad chli denaebed... und erscht die chline Peruaner :)

Nevado Chachani (Bild 12 im Hintergrund)
Ja, das isches speziells Kapitel fuer mich...eifach nume wow und zaemmegfasst...straeng, Schnuf, Chopfweh, Schritt fuer Schritt, orientierigslos (und das lit ned a mim schlaechte Orientierigssinn) und efiach nur e Erfahrig wo eimalig wird blibe.

Am Donnschtigmorge ische sowit gsi..d'Marion und ich sind i de Agentur itroffe und vo 2 Bergfuehrer ikleidet worde. Mit 5 andere Spinner sind mer de mitem 4x4 3h lang e Schotetetererpistetete deruf uf ca. 5000 Meter bracht worde. Vo det sind mer ca. 1 h zum Basislager gloffe (hmm...wenn mini Zuerimarschgschwindigkeit amene Pferd glicht, wuerdi saege oepe Kakerlaketempo)
S'Zaelt hend mer de i windeseile (also au ned wuerklich schnell und mit viel Schnuf ufgstellt und hueslich igrichtet) Euses Z'Nachtmenue het us Spaghetti mit Buechsethon und Ketchupsauce bestande und isch bequem im Stah und miteme Loeffel (oeppis anders hets ned gha) igno worde...es isch so A...chalt gsi (d'Sunne isch grad abe) dass mer de ned trurig gsi sind, wos am 7ni in Schlafsack gange isch und mir d'Liechter gloescht hend. Gschlafe hend mer ned...de uf 5200m isch das recht schwirig und bi mir het sich min Chopf irgendwie wie en ufblasne Geburibalon agfuehlt :)
Am Morge am 01:00 Uhr isches de losgange...schnaell alege (also drue Paar Hose (Skihose inklusive) und Obe au 5 Schichte, 2 paar Haendsche + Socke und natuerli e Chape und d'Stirnlampe) s'Freiluftwc benutze (wie mached ihr Herre das i dere chelti ca. -15 Grad?), Rucksack packe, oeppis aesse und ab di Poscht.
So sind mer ca 6.5 h de Berguf gschliche (vorher simmer e Kakerlake gsi...jetzt, jewiter s'gange isch umso meh het euses / mis Tempo amene alte Schnaegg mit Stock gliche). Schritt, Schritt, Stah, Chuech, Schritt, Chuech, Stah..min Kopf het sich langsam nacheme Heissluftballon agfuehlt und mini Haend sind mer fascht abgfrohre.. Je hoecher mer cho sind umso weniger hani mi im Griff gha (also ich mit zviel Alk bi grad no heilig). Ich ha gschwanked und min Orientierigs- und Ziitsinn het sich ganz zum Staub usgmacht. Zum Glueck hani d'Marion als Motivator gha. Irgendwenn isch de d'Sunne (Bild 14) uf und irgendwenn sind mer de bi so komische Schneepyramide gstande und hend de Gipfel (6075m) erreicht (Bild 15). Gstande isch glaub niemmerd me, es sind alli wie toti Fluege umeglaege..und Schuuuuf..(min Chopf isch mitlerwile zumene luetende Gloggeturm worde)

De Abewaeg isch das mal wie es Gschaenk fuer mich gsi...denn je witer aber mer cho sind, umso weniger weh het mer de Chopf da und au min Glichtgwichtssinn het sich wieder stabilisiert. I ned ganz 2h hend mer s'Basislager erreicht (ufem Sand sind mer irgendwie mit de Stoeck wie uf Ski abegfahre). Im Basislager schnaell s'Zaelt zaemerume, alles in Rucksackstopfe, 1h zum Jeep chragsle und de ab di Post...3h d'Shotttterpissssste ab. Tetetetete...hets gmacht....mini Zae klappered huet no vo dene 3 h.

Z'Nacht sind mer de e richtig feini, wohlverdienti Belohnig go aesse...es richtig feins Steak hets muesse sie :) ..und langsam aber sicher het sich au min Kopf wieder nach Elefantegroessi agfuehlt.

 

So, jetzt hani aber e Tonne gschribe...und hoffe eu vergaht s'Laese ned...sucht eifach maelde wenns zviel isch...versuech mi snaechschte mal chuerzer zfasse :)  ..und drucked mer Dume, dass i morn ke Zahweh me ha und aendli daerf witerreise...

Liebe Gruess und bis bald

Bilderbeschribig
Bild 1  -- Ussicht vo Cusco
Bild 2 --  Maert in Cusco
Bild 3 --  Moray (Therasse vo de Inkas...dur die verschiedene Stufe hends choene verschiedeni Sache aseie
Bild 4 --  Salineras (kuenstlich agleiti Salzbecki)
Bild 5 -- MacchuPicchu
Bild 6 -- Uros

 

 

 



Cusco und Umgebung

11:19, 10 October 2012 .. 3 comments .. Link

Hallo mitenand

Aendli schribi eu wiederemal.
Huet isch min letschte Tag da in Cusco, denn morn gahts witer nach Puno und denn nach Arequipa.

I de letschte paar Wuche hani Ziit gha mich da izlaebe und es gfallt mer immer besser. D'Luet sind mega und langsam aber sicher chani mi au mitene unterhalte...so meh oder weniger :)

Cusco isch e geniali Stadt..eifach meeeega turistisch. Ueberall hets chlini Laedeli und 1000 vo Souvenierjobs. D'Strasse sind fascht alli mit Bsetzistei beleit und grad so gross, das 1 Auto und ein Fuesgaenger Platz het..es isch also so guet wie ueberall 1-Bahn und wenn d'Frau Hess en langsame Fuessgaenger vor sich het (was fascht immer de Fall isch) de muess au ich mich zuegle :) I de Nacht ziehnd u viel Hunderudel dur d'Gass und sueched nach Fueter..
D'Schuel, s'Aesse und de Usgang sind de Wahnsinn gsi. Mega genial. Ich han i dere churze Ziit mega viel glernt, han fuer 10 Soles amel es Menue zum Znacht gha  (frischpraesste Saft, Suppe, Menue und Dessert) und han de Usgang gnosse. Fuer d'Salsalektione hani mi nuemm so viel choene motiviere...die Peruaner sind mer irgendwie eifach zklaebrig und da isch d'Salsalektion ned gad s'Beschte..  :) ..ihr kenned mich ja.

Ich han u viel Usflueg gmacht, bi a jentschte Ruine i de Umgaebig gsi und natuerli bim und ufem Macchupicchu gsi. Wow...eifach beidruckend. Es isch wahnsinn was die Inkas anegstellt hend und wie klever die gsi sind...mit dere Bauwis hets min Arbetsgeber ned wuerkli brucht :) Damit de Macchupicchu au es bsundrigs erlaebnis wird, hani ich mich 3 Taeg uf de Inka Jungel Tripp begae. Ich bin Mountainbike gfahre, bi go Riverrafte, Gwanderet und bi go Zipline... leider het sWaetter ned immer mitgspilt...aber das hets nur no spannender gmacht .. -nei, muend kei Angst ha, anderscht als bim Kajake het mis Schuelterli und mini Chnue ghebed - juuupii

Natuerli bini au im Valle Sagrado de los Inkas -d.h. Pisac, Ollantaztambo, Chinchero, Moray und Maras / Salineras- gsi. Au dFestig Saqsawaman-Quenqo -Pakapukara und Tambomachay grad oberhalb vo Cusco hani mir ned entga la. Es isch alles mega idruecklich. Jede Stei passt exakt uf de ander und so isch Zement, Lehm oder was au immer ueberfluessig.

Bim Usflug zu de Saqsawaman -was sStudis uebrigens Sexywoman naenned- bini eleige gsi...und es isch ned lang gange und scho hani en peruanische Fruend gha -hihi- er het mer die ganze Ruine zeiget und natuerli au uf spanisch erchlaert...ich han eifach immer mitem Chopf gnickt will verstande hani jo ned wuerkli viel...aber das het de glaub ned gmerkt...uf allfaell isches jetzt en dicke Freund vo mir...und er het gseit wenni au immer es Problem ha...ich chanem aluete...hmm weiss eifach ned wasi soell sege, will mis spanisch wird wohl am Telefon ned usreiche -grins-

Suscht isch mis Laebe bis jetzt eigentli raecht ruhig verloffe...Schuel, Ufzgi, viel neui Luet und Usgang...das wird sich i de nacheschte Taeg bestimmt aendere...da gahts ja mitere Holaenderi und ere andere Schwizeri ab uf Puno...mal luege, wie das Rucksackreise so wird...

So, das isch jetzt gnueg blabberet...falls er me wend wuesse, eifach schribe. -smile-
...und jo, mit de Foetli stahni chli uf Chriegsfuess...hoff chaeng eu es paar mitschicke..aber irgendwie wets ned so wie ich ...und sInternet isch au uuuuu meeeega langsam.

Liebe Gruess und bis bald
Eliane



Areis und Schuelafang

12:48, 20 September 2012 .. 3 comments .. Link
¡Hola!  :)

Ich bin guet in Cusco gstrandet.
Nachere 24h-Reis mit ned grad de bestae Fluggsellschaft, eme Ticketproblem und 2 Zwueschestops isch das wuerkli bemerkenswert  :)

Viel hani eu noni zverzellae und Foti hets leider au no kei..muessmi da zerscht no organisiere :)

D'Gastfamilie isch meega luschtig....sie hend irgendwie 5 Chind (wobi nur 2 mit mir wohned). De chliner Diego isch 9 und schwaetzt nonstop uf mi i...und de, oho ich sprichs falsch us...de wird de korrigiert und korrigiert, bisses sitzt  :) Drum naenn ich ihn nur no el profesor :) Mir hend au en Hund i de Familie..und nei, fuer die woni vo minere Gastfamilie vo Suedamerika verzellt ha, er wird mer glaub ned uf s'Bett mache  :) Ich hoffs zumindest.

I de Schuel bini (oh wer wunderets) als Afaenger igstufft worde und bin momentan innere Klass vo 5 Schueler. Da ich mich ha welle integriere, hani mi voll ufen Salsakurs ila..und jetzt heisst fascht all Tag fuer 1 h Salsa :) Wo gits de suscht inere offizielle Salsaschuel fuer CHF 4.50 1h lang Salsaunterricht?
Jaja, ihr choend scho lache...ich weiss, ich bi die geboreni Salsataenzeri...sogar de Lehrer het das scho festgstellt  :)

So, viel me weissi noni zverzellae...und da jetzt de scho z'Nachtaesszit (mir hend Mi. 19:00Uhr) isch mach ich mich mal uf Futtersuechi....

Ich wuensch eu ganz gueti Ziit und maeld mi hoffentli snachescht mal mit Foeteli  :)

Liebe Gruess us Cusco

Über Mich

Start
Mein Profil
Archiv
Freunde
Mein Photo Album

Links


Kategorien


Letzte Beiträge

Santiago de Chile / Buenos Aires / Patagonien
Potosi / Uyuni / Suedchile
Copacabana / La Paz
Puno / Arequipa
Cusco und Umgebung

Freunde