OREO En Strassehund us Griecheland

Ede Zwüscheziit...

So ech ben au weder emal da...

Han grad chli en strubi Ziit hender mir.Ben paarmal em Spital gsi bes mer usegfunde hätt dass ech schwanger gsi ben, und nach churzer Freud scho weder Leid...

S Baby hätts ned gschafft... und wer mer ohni Wort nur met Wärmi vell Chraft und Liebi geh hätt esch de Oreo gsi. Er esch eifach wunderbar, mer hätt s Gfühl er verstaht eim, vorallem wänns eim schlächt gaht.

Das ben Ech metem Oreo

Das esch eini vo sine typisch luschtige Sitz Stellige :)

Chan mer dene Auge wederstah?? :)

Das esch de berühmti Oreo- Hundeblick

Au nach jedem Höch chunt emal es Tüf... LUNGEWÜRM

Sesch natürlich ned lang gange bes sech alles nur no um de Oreo dreiht hätt und er mer unglaublich wichtig worde esch.

Doch öppe nach paar Täg wo ech ehn becho han, hätt er wie veruckt ghueschtet. Er hätt nüm vell gässe und au ned chöne schlafe . Also beni mit ehm zum 1. Tierarzt gange...

De hätt dänn Lunge, Herz ect. abglost und nüt gfunde und hätt gmeint es segi velecht de Stress. Beruhigt hätt mech das ned würkli, wells eifach ned zum zueluege gsi esch...

Also beni los zum 2. Tierarzt. Weder die gliche Undersuechige... und weder nüt gfunde... S gliche bem 3.

Bem 4. Tierarzt dänn ändliuch en Diagnose: Lungewürm. De Oreo hätt dänn grad Atibiotika becho wo zerscht ned händ wele würke, en Griecheland gehts halt weder ganz anderi Arte vo Würm als be eus ede Schwiz...Zum Glück händ dänn aber die 2. Antibiotika ghulfe und de Oreo esch jezt au total gheilt...

Han aber würkli lang Angscht gha, das ech ehn chönti verlüre wänn mer ned usefendt was es esch...

Gott sei Dank esch aber alles guet cho!

Und so esch er zu sim Name cho...

Da er ja us Griecheland chunt hani natürlich ihm au wele en griechische Name geh. Mini Kollegin esch en halbi Griechin und hätt mer dadebi ghulfe

Zerscht hani dänkt eifach so öpis ähnlichs wie Schatzeli, was dän SPLIMO gheisse hett was au no süess tönt hett. Han mech dänn aber doch für OREO entschide wo so öpis ähnlichs heisst wie "Gueute" oder au "Hübsche".

Das wär ebefalls de Oreo met sim schöne Namenshalsband, dass er wänn er mal abhaue würd schnäll weder gfunde werd:)

Das esch es Foti vom Oreo :)

So hätt alles agfange...

Scho lang han ech mir en Hund gwünscht. En treue Kolleg wo Site a Site met eim durs Läbe gaht...

Am 4. Oktober 2006 beni dänn is Tierheim gange. Es esch unfassbar wevel Tier eifach achtlos abgeh werdet. Scho em Auto han ech mer überleit wie ech mech söll entscheide wänn sovill verschideni Hünd döt send, eine süesser als de Anderi.

Em Tierheim acho, häts eis Ghäg gha wo all Hünd fredlich metenand dusse gsi send. Wo si mech ghört händ send all füre as Getter cho und händ welle uf sech ufmerksam mache. Und ganz hende esch ein süesse schüche hellbrune Hund, ganz ruhig gsässe und hätt mech agluegt

Mer händ dän grad euse erschti Spaziergang uf de Wise näbedra gmacht, was gar ned eso eifach gsi esch, dänn de süessi Hund esch erscht grad paar Täg vorher in Züri am Flughafe acho. Leinene send ehm also total fremd gsi, dänn en Griecheland hätt er uf de Strass gläbt.

Am gliche Abe no semer dänn metenand em Auto heigfahre und das esch de Afang gsi vom Oreo und mer