..around the world..

Perth

{ 02:53, 23 January 2008 } { Eingetragen in 3_Australia 2007, 2008 } { 1 Kommentare } { Link }

Here I am..  And there's quite a lot to keep up with..

Melbourne

Mis Hostel isch z St. Kilda gsi, es Quartier am Meer, u so hani o 2 Taeg am Meer verbracht u bi nur 2 Mau mit em Tram id Stadt. Z Waetter isch super gsi, fuere Strand grad so perfekt. Ei Abe bim Spaziere am Meer hani de o dr 1. Promi gse z Australie.. isch aber sone Australian Idol Heini gsi ;) Haette sich die chline Meitli nid so uffaellig benoh, haetti ihn aeuae gar nid bemerkt.
Ir Stadt bini naebscht em Ussichtsturm, em Botanische Garte und em Fluss chli a chaute Plaetz nache, u die hani i Museums gfunde.

Great Ocean Road
Uf dere 3 Taegige Tour si mer ar Kueschte nah uf Adelaide gfahre und hei drbi wunderschoeni Landschafte choenne bestuune. Es het sehr gfaegt wieder mau Luet kenne z lehre. Mir si de z Adelaide o aui zaeme ine Bar, u hei ues de no Pizza lah cho zum Znacht.

Adelaide
Am erschte Tag bini chli er Ichoufsstrass nache glofe u hami de knapp 2 Stung imne Buechlade choenne verwiile, waers dert in nid so chaut gsi, haettis no paar Stund usghaute. Bi zerscht mau ae Ewigkeit i Reisefuehrer go laese unger angerem im Lonely Planet vor Schwiiz. Waer gloub no ae schoeni Destination, i ha drum mini Reiseplaen gaendert und ga Aendi Maerz no ir Schwiiz go umereise!!! ;) hehe
Bi de o nid mit laere Haende us em Lade, ha mer The Da Vinci Code kouft.
Denn bini uf Kangaroo Island und woni wieder bi zruegg gsi hani dr Namittag am Strand verbracht.

Kangaroo Island
Das mau hei mer ae chlinere Bus gha, und woni ir Jugi abghout bi worde si de o scho 3 drin ghocket woni vor Great Ocean Road scho kennt ha. Es isch de no eini meh drzuecho, auso hani scho mau 4 Luet kennt.
Uebernachtet hei mer vorusse, im "Swag". Es isch ziemlech chaut gsi, aber da i ja ae guete Tipp uebercho ha, bini o chli mit warme Chleider usgrueschtet gsi. Dass mer aber am Abe mit Pulli u Decki vorusse hocke hani mer de scho nid grad choenne vorsteue. I bi ja schliesslech z Australie?! :) Es isch absolut atemberoubend gsi dr Staernehimmu azluege, i hami so gluecklech gfueeut i dem Moment. Leider ischs ir Nacht cho raegne, de hei mer muesse unger ds Dach zuegle. Am 2. Abe si mer z Wildlife ir Nacht go aluege, ufem Waeg zur Kueschte hei mer oepe 4478 Kangaroos und 987 Wallabies gse!! (Mir si mit em Bus gange und hei sae drum im Schiinwaerferliecht guet gse). Mir hei ues de uf Pinguin Suechi gmacht und schlussaendlech spaerlechi 3 entdeckt. O die 2. Nacht hani wieder unger dae Staerne verbracht. Am 3. Tag hei mer de choenne schnorchle, nur hets a dem Flaeck absolut nued spannends z entdecke gae.

Adelaide - Alice Springs
Wieder ae Tour, und wieder hani 3 Luet kennt. Mir hei die erscht Nacht z Coober Pedy verbracht, imne Hostel wo sich im Feuse befindet. I dere Stadt mitte im Nichts laebe 80% vo dae Iwohner unger dr "Erde", ausi i Hoeline, aber nid uf primitivi Art und Wiis sondern sehr zivilisiert, i vollkomme haerkoemmlech igrichtete Wohnige. Eifach ohni Fenschter u mit Feusewaend. Die "Stadt" isch beruehmt fuer d Opal gwinnig, und mir hei de o choenne i Bode abe go luege wie sone Bohrsteu usgset.
Mir si aui zaeme go Pizza aesse u de no schnaeu ire Bar verbi ghuepft.
Uf dere 2 Tage Tour simer gloub um die 1500 km gfahre, und das antlang vo Sand, Buesch, Sand, Buesch und Sand. DIe einzig Abwaechslig het ae Sauzsee bote, dae isch aber volkomme ustrocknet gsi, nur no z Aauz isch am Bode uebrig blibe.

Outback
Am 6.15 bini vom Hostel abghout worde, u de so am 7ni simer iz Outback use gstoche. Ume Mittag si mer de bim very famous Uluru (Ayers Rock) acho u hei mau die erschti Ladig Fotos gschosse. Am Nami si mer de ufne chlini Wanderig und de i ueses Camp im Uluru National Park. Vor Sunneuntergang si mer de losgfahe zum dr Rock im Abeliecht z gse.
Uebernachtet hei mer wieder im 100 Billiarde Staerne Hotel.. und si de am 4i ufgstande zum dr Sunneufgang am Uluru z gse. Bir agnaehme Morgetemperatur hei mer de choenne ufe Uluru ufe loufe oder rumum, und i hami de fuer z Rundum loufe entschiede. Das si ca. 9km, und het chli meh aus 1.5h brucht. Zum GLueck hani es Floeigenetz gha, so hani die Viecher nid anduurend muesse us mim Gsicht verschueche. Es gset zwar chli Bank-Ueberfau maessig us aber i HASSE die Floeige ir Nase und i dae Ohre. Und im Outback us isch das eh raecht trendy!!
Die zweit Nacht hei mer ir Nechi vo Kings Canyon verbracht, aes liechts Gebirge wo mer de am naechschte Morge 3 Stung si go wandere. Mir si umgae gsi vo Dingos, u ir Nacht bini de o ufgwacht waeg dene, weu sie Laerm gmacht hei bir Suechi nach Diebesguet. Das hei sie de o gfunge, sie hei irgend es Chleidigsstueck ab emne Busch grisse. I ha sae versuecht z verschueche, ha aber chli z fescht Angscht ha zum ufzstah. Mir hei de o dene ihres Huele ghoert, aui zaeme, vo jedere Siite!! Fuer d Wanderig hei mer muesse 3 Liter Wasser mitschleppe, 1 Liter Wasser pro Stund isch s Pflicht bi dere Hitz!
Da mer scho am 6i agfange hei mit Wandere si mer de am 10ni wieder bim Camp gsi und hei dert choenne ae sehr erfrueschende Schwumm im Pool naeh. WONDERFUL.. I choennt kes Wueschtetier si, die Temperatur bringt eim fascht um! Nach 3 Taeg bini mers aber de scho chli gwohnet gsi bi 40 Grad. Zruegg in Alice si mer de go Znacht aesse.
I ha de no ei Tag z Alice verbracht, isch aber VIU z heiss gsi zum duss oepis mache, so hani mi iz Zimmer zruegg zoge u ha mau wieder Tagebuech nache gfuehrt.
Geschter bini de uf Perth gfloge, a Board 2 woni uf Toure scho gse ha.
I hami de im neue Hostel iquartiert... es het mi aber leider scho vo Afang a nid so choenne ueberzuege wie d YHA's und z Base, beides sehr moderni und suberi Hostels. Leider isch es hie ziemlech drackig, und das hassi so sehr. Es cha autmodisch oder chly si, aber draeckig isch eifach haesslech. Zu auem haere isch das no das Hostel woni am auerlengschte blibe, fuer 9 Naecht. I cha leider i kes angers Hostel, da mer die z Gaeud nid wuerde rueckerstatte. Tja, machi haut z beschte drus. NO WORRIES wies da z Australie so schoen heisst.

I vermisses chli uf Toure z si, dert hets mit dae Luet immer gfaegt.. dert lat sich am eifachschte Kontakt chnuepfe. Ire Wuche gani de uf mini letscht Australie Tour uf Exmouth.


{ Schreibe ein Kommentar }

heeeeeee....

{ 10:00, 24 January 2008 } { Erstellt von LenaKa }
... das geit doch nid: wo blibe o d kommentär...!? muessi doch grad öppis dran ändere ;-) findi sübin, hautisch du üs so guet ufem laufende!

i würd iz grad u gärn mit dir tusche oder eifach o chli mit dir unterwägs si. bi mir stöh iz tatsächlech scho d prüefige vor dr tür. *bibber* die ersti - english - hani hüt grad hinter mi bracht...

häb witerhin vieu spass u gniess jede einzeln moment...! take care

{ Letzte Seite } { Seite 11 von 35 } { Nächste Seite }

Über mich

Startseite
über mich
Archiv
Freunde
Mein Fotoalbum


Links


Kategorien

1_on the road to... 2007
2_Sydney 2007
3_Australia 2007, 2008
4_New Zealand 2008

Neue Einträge

nostalgic....
Fotos
..I'm trying hard..
I bi.../Je suis.../I am...
North Island
New Zealand (South Island)
111
Fotos
Christchurch
Goodbye Australia

Freunde

AlyChica
web counter webcounter