Tony goes to Canada

Fritig 6. Oktober 2006

{ 08:46, 6 October 2006 } { Posted in Vancouver } { 0 Kommentare } { Link }

So jetzt hock ich da vorem PC mit Grindweh, han geschter mich no vo mine "Classmates" gebuehrend verabschiedet und deshalb isch fuehl ich mich dementsprechend noed grad fit. So nach jetzt 8 Wuche neigt sich min Schprachufenthalt langsam em Endi Zua. Am Afang han ich no regelmaessig Zyt gfunde zum min Blogg ufem aktuellschte Schtand z'halte, aber Vancouver isch so gross und so vielsietig, so dass ich halt das mit em aktualisiere vernachlaessigt han. Sorry. Ich moechte miner chliner Leserschar Danke saege und bis bald...

 

Fuer Die wo am Sunntigmorge no nuet vor haend, da aen chline Vorschlag:

 

Min Flug mit de Air Canada , AC 878, landet um 8:35 am Morge in Zueri 



WKND vom Fritig bis Sunntig 25. - 27. August

{ 12:11, 6 September 2006 } { Posted in Vancouver } { 0 Kommentare } { Link }

 

 

Fritig 25. Auguscht

So nachere wilde Nacht am Vorabig im Roxy, sonen Nightclub wo e Liveband Nonstop Partymuisig schpielt, han ich mich ziemlich schnell so ines blonds Corona verschosse. Die Einte vo eusere Schual haend nie daenkt, dass ich eso chan abgha, aber ebe Walliser, da bruchts kei Wort meh zum erklaere... Chli Mit enem liechte Nahbrand i dae Schual gaht Zyt au noed schnaeller verbi :-(  Am Namitag heat Schual no sonen gratis Trip is Lynn Valley abote, wo ich natuerlich mit gange bi go chille. Nachenem chline 'Hike', was so oeppis wie spaziere beduetet, bin ich denn no chli go bade in so en chalte Fluss, was richtig guat tha haet!

Ueber de Abig muass ich noed viel saege, numan isch fascht glich gsi wie am Vorabig. Da ich min letschte Bus verpasst han.. Oje, aber mit em Nachtbus muass ich halt fascht e Schtund heilaufe. Zum Glueck haets denn no so komischi duetschi Luet gha, wo au per Zufall i mini Richtig haend muesse, denn haemer z'Taxi bschtellt und so gege die 3 bin ich mal dihei gsi.

 

So gsehts im Lynn Valley us... herrlich zum bade...

 

 

Samschtig 26. August

Nach guat vier Schtunde bin ich us mine Troim grisse worde, denn huet haets gheisse auf nach Whisler Mountain. Mit chlinere Komplikationen haemers denn noch gschafft endlich es Mietauto z'becho. Nachere knapp 2 stuendige Fahrt simer denn i dem legendere Whistler acho. Scho no beidruckend, so ne High Society Stadt i de Berge. Nachere Village Besichtung simer denn no oeppis go happere, wobie ich immer no chli Nachwehe vom Vorabig han. Da eus sone Quad-Bike-Tour z'tuer gsi isch, simer halt go River Rafte. Miar haend da sonen Guide vo New Zealand gha, ganz en komische Spatz, aber en luschtige! De Tony haet denn no eine uf Frau muesse mache und no chli go shoppe, bevor mir denn am Abig wieder uf Vancouver zrugg sind. Isch en herrliche Tag gsi...

links euses Grueppli, wobie euse Fotograph no fehlt und rechts en Blick is Dorfbild

 

 

Sunntig 27. August

Als erschtes han ich am Morge frueh um 9ni wieder de Mietwage zrugg bringe, han Angscht gha, wiel da sones paar Chratzer ploetzlich uftaucht sind, aber de vo de Mietwagevertretig het zum Glueck nuet gseh und au nuet mitbecho, dass ich Vorabig han welle usefinde ob en Nissan Altimea staerscher isch oder sone verdammti Hammerlimousine. Am 10 am Morge han ich denn no mit Einere abgmacht gha zum chli go laufe i de Region. Bowen Island isch denn eusi Destination gsin. Ische wunderschoeni Insle, noed ueberhaeuft vo Tourischte und ganz ruhig  und idiyllisch. Nachenem chlinen Spaziergang um en See, namens Kilany Lake, simer denn no chli ad Beach go chille bevor mir denn zrug uf d'Faehre fuer hei sind. Todmued isch denn de Tony gsi, wo er endlich im Nescht gsi isch. Was ich vergesse han z'saege, haetti z'ganze WKND schturmfrei gha... Aber mini Homestaymuatter haet mich gfroeget, ob ich denn das wuerdi usnuetze. Da han ich gseit, ich bi noed de Typ fuer so Sache. Denn haet Sie mir gseit, Don't say that!

links, ich am Boimsurfe und rechts de Kilany Lake uf Bowen Island

 

 

 

 



Mittwuch 23.08.2006

{ 12:42, 24 August 2006 } { Posted in Vancouver } { 0 Kommentare } { Link }

Salu Zaeme, ja dr Wunsch nachm im Letscherdietsch chna isch schin nahvollzieh, aber das wird schwieriger, da ich hie uf miner Taschtatur kei ae und oe und ue han... Sorry. Don't Worry about them...

 

Fritig

Am Fritig bin ich wie jede Morge id Schual, andere choemet denn wenns Luscht haend oder nachdem Sie noed so lang im Usgang gsi sind. Dae Morge isch schnell verbi gange. Bi nach de Schual no go chille am Hafe bevors denn am Abig gheisse het: BC LIONS, GO LIONS GO... Mir sind en Candian Football Match go luege... Isch aber meh Enterainment gsi, als Sport. Z'Bier isch huere tuer im Schtadion gsi ungrechnet 8 Schwizer Franke fuer e Schtange, das waer nuet fuer euse Buenzli Schwizer Feldschloessli Biertrinker S. C. us B. Aschluessend bin ich no anere Bye Bye Party gsi vonem Schwizer, wo ich da kenner glernt han...

(Rechts euses Hardcore BC LIONS Hooligans und rechts euse Masseusene fuer nachem Spiel)

 

Samschtig

Nach chli Uschlafe, bin ich denn an Red Bull Flugtag gsi. Es isch en riese Event gsi, aber nach oeppe 6 Schpringer, isch es mir langwillig worde und bin no chli go shoppe. Am Abig simer denn no is Cambie go Pitcher leere... Jetzt weiss ich wenigschtens was es Pitscher isch, en Chueble voll Bier... Juhu... Aber da ich zum erschtemal de Nachtbus gnoh han, han ich no doerfe ei Schtund heilaufe, aber ich han ja da gnuag Training, Letschen laesst gruessen ;-)

(Euses Grueppli am Flugtag)

 

Sunntig

Nachenem laengere Usschlafe bin ich denn no chli ad Lonsdale Avenue in Noth Vancouver go laedele... Han mir es Hemd chauft und en neue Guertel vo Element. Aber die Lonsdale Avenue isch no cheibe lang... Am Quay acho bin ich in Gnuass vonem Rock and Roll Konzert cho und han d'Ussicht uf Skyline gnosse. Am Abig haets gheisse Tony, jetzt muasch zeige dass en Maa bisch. Han muasse mini dreckigi Chleider Waesche, Tumblere und Buegle... Und ma staune ich hans gschafft. Nach sonem Waeschabig bin ich todmuad gsi und bi aschluessend go schlafe.

(links es Radarzeiche a de Lonsdale Avenue und rechts d'Skyline vo Vancouver)

 

Mentig

It's just another manic Monday... *sing* Guet erholt vom Waesche haets denn wieder gheisse id Schual um Englisch z'lerne oder so tu als ob. Nach de Schual bin ich mitenem andere agfressene Mountain-Biker us dae Schwiz go Shops durchstoebere und ich han min Traum uf zwei Raedli gfunde und das ganze naennt sich Superlight vo Santa Cruz. Es klaht mich nuemme los...

 

Das waers fuer de Moment liebei Luet... Ich hoffe, ich mag eimal i dae Wuche es wuechentlich Zaemefassig schriebe. Also hebets guat und hebet Eu sorg. Gruass eue Tony

 



Tschischtig 15. Auguscht 2006 (Jetzt bin ich da)

{ 10:31, 15 August 2006 } { Posted in Vancouver } { 4 Kommentare } { Link }

Nach ere lange und muehsame Reis bin guaet in Vancouver acho. Am Flughafe scho z'erschte Problem: Wo isch min Abholdienscht? Nach wiederholtem hin und herlaufe vom Domestic und International Teil han ich denn au de emal gfunde. Bi recht herzlich vom Gastvater empfange worde um Abig um 23 Uhr. Die ganzi Familie isch recht nett. De Vater chann sehr guaet choche, sogar besser als mini Mama  und Mutter macht die beschte Margeritas. Zimmer wo ich han isch recht gross, han es riesiges Zimmer mit Fernseh und Couch und eigenem Badzimmer.

 

Am Mentig haets denn zum erschtemal gheisse Tony du bisch wieder back in school. Naja na enem Ischtufigstescht haends mich zu minem Erschtuhne ine Intermediate class iteilt. Laeck han gmeint, ich chan keis Wort Englisch meh.

 

So ich soett jetzt wieder... Greets from Tony



Samschtigmorge 12 Auguscht 2006, i aller Herrgottdfruäh (No knapp 7h)

{ 05:20, 12 August 2006 } { Posted in Vorbereitung } { 1 Kommentare } { Link }

Nachdem ich min Arbeitsplatz grumt han und mini reschtliche Sache verpacket han, han ich no äs Ustrittsgschpröch mit minem Bereichsleiter gha. Nachdem au das sin Weg gnoh hät isch es bald oder gli emal Zyt worde nomal zrugg z'lugä, was ich da die letschte 6 Jahr gleischtet han. Es isch scho no es komisches Gfühl vom eintä Tag zum andere zum Student degradiert z'werdä . Aber das isch scho sit längerer Zyt fescht gschtande. Ich möcht nomal em Bereich SV es riese grosses Merci usschpräche und hebets guät mitenand und au wenn en Walliser weg isch, aber wenigschtens lebt es Schtuck Walliser in Eu wieter. Vorallem id dä Skiwknd's werdets Ihr denn scho merkä . Nomals Merci und blibet wie ihr sind und denn chunnts guät!

 

Am Abig isch  rächt zu und her gange im "engere" Kollegechreis. Ich möcht allne dene Danke wo de erschwinglich Wäg is Vibes in Bassersdorf uf sich gnoh händ, vorallem im Chef (Regardez ou est le Vibes). Han nie dänkt, dass es soviel det ane schaffet. . Irgendwie sind au emal im Vibes d'Liechter a gha gange, so dass mir eus (mini Wenigkeit und äs paar Hirnzelle) de Wäg id ultimative Guät-Nacht-Bier-Bar gfunde händ in Basi, au als das legendere "5i" bekannt, gfunde händ. Gäll Enz, wo Brenz? Isch en coole Abig gsi...

 

Jetzt isch es scho unterdesse 6i gsi und Schtunde schwindet langsam dehie...

 

Dass isch jetzt min letschte Bricht gsi us dä Schwiz und übrigens z'Wetter isch z'Vancouver so um die 24 Grad und liächt bewölkt. Es wird Zyt, dass ich ändlich no chli Summer gsehne

 



Mittwuch 8.Auguscht 2006 (No 4 Täg)

{ 09:55, 9 August 2006 } { Posted in Vorbereitung } { 0 Kommentare } { Link }

Han hüt mich no gschnell mit Dictionnaire usgstattet vo Langscheidts, hätti zwar scho en Dictionnaire, aber de isch nume für Mann <=> Frau. De würdi mir glaube ich schprachlich nöd viel nütze, aber besser d'Fraue z'verschtah, die sind ja eh alli glich  (Bitte liebe Fraue oder söttig wo es no werde möchtet, nehmets nöd z'ernscht!) Denn isch es gli emal um d'Chleider gange, wie wird ächt z'Wätter si, bruche Outfits für dä Usgang, mini Mountain Bike usrüschtig muäss au no mit. Ob alles Platz hätt wird ich denn am Fritig merke, wenn es zum Vorabig Check-In gaht.



Mentig 6. Auguscht 2006 (No 6 Täg)

{ 10:20, 7 August 2006 } { Posted in Vorbereitung } { 1 Kommentare } { Link }

Han dänkt letscht Winter, da chauf ich mir sone grossi Hockeytäsche, damit ich denn im August für dä kommendi Schprachufenthalt schomal öppis ahgschafft han... Han hüt müässe feschtschtelle, dass die Täsche die zuälässige Abmessige nöd ihaltet. Shit... Nach langem suäche und grüble im Cheller, han ich dänn ändlich mal öppis passends gfunde. Ä Goffere mit Rädli und ä Sporttäsche mit Rädli... Juhui.. Eis Problem weniger...

 Mini Reiseuntensilie



Über mich

Startseite
über mich
Archiv
Freunde
Mein Fotoalbum

Links

Webcam Vancouver

Kategorien

Vancouver
Vorbereitung

Neue Einträge

Fritig 6. Oktober 2006
WKND vom Fritig bis Sunntig 25. - 27. August
Mittwuch 23.08.2006
Tschischtig 15. Auguscht 2006 (Jetzt bin ich da)
Samschtigmorge 12 Auguscht 2006, i aller Herrgottdfruäh (No knapp 7h)

Freunde

davidand